गट ग्रामपंचायत बोरशेती, तालुका व जिल्हा पालघर (पिन कोड – ४०१५०१) ही प्रामुख्याने ग्रामीण व आदिवासी लोकवस्ती असलेली ग्रामपंचायत आहे. येथे पारंपरिक आदिवासी संस्कृती, रीतिरिवाज व सण-उत्सव आजही जपले जातात. गावातील देवस्थाने, समाजमंदिरे व सामुदायिक कार्यक्रम हे ग्रामस्थांच्या सामाजिक जीवनाचे महत्त्वाचे केंद्र आहेत.

सन २०११ च्या भारतीय जनगणनेनुसार या गावात एकूण लोकसंख्या १९४९ आहे. त्यापैकी ९७४ पुरुष व ९७५ महिला आहेत. या भागात प्रामुख्याने आदिवासी व कुणबी समाजातील लोक राहतात.

कुणबी समाजाचा मुख्य व्यवसाय शेती असून ते विविध पिकांची लागवड करतात. आदिवासी समाजातील लोक शेतमजूर, वीटभट्टीमजूर तसेच इतर कामगार म्हणून काम करतात. याशिवाय काही प्रमाणात कुक्कुटपालन व बकरीपालनही केले जाते, ज्यामुळे त्यांच्या उत्पन्नात भर पडते.

पावसाळ्याच्या काळात, विशेषतः श्रावण महिन्यात, येथे एक विशेष नैसर्गिक वातावरण निर्माण होते. ढगांचा गडगडाट, विजांचा कडकडाट आणि पावसाच्या सरींमध्ये रानात “अळंबी” ही नैसर्गिक भाजी उगवते. ही भाजी अत्यंत चवदार व आरोग्यासाठी उपयुक्त मानली जाते. मात्र अळंबी उगवल्यानंतर ती लगेच काढावी लागते, कारण ती लवकरच फुलून खाण्यास अयोग्य होते.